विश्वकपमा सर्बिया र क्यामरुनको रोमाञ्चक बराबरी

काठमाडौं- कतारमा जारी फिफा विश्वकप फुटबलमा सर्बियाले क्यामरुनसँग रोमाञ्चक बराबरी गरेको छ। समूह 'जी'अन्तर्गत यी दुई टिमको दोस्रो खेलमा दुवै टिमले ३-३ को बराबरी खेलेका हुन्।

खेलको २९औं मिनेटमा गोल गर्दै क्यामरुनले जिन चार्लस कास्टेलेट्टोको गोलबाट अग्रता बनाएको थियो। तर सर्बियाले पहिलो हाफमै दुई गोल फर्कायो। सर्बियाका लागि पहिलो हाफका इन्ज्युरी समयको दुई मिनेटबीच स्त्राहिन्जा पलोविच र सेर्गेज मिलिनोविच साविचले समान १–१ गोल गरेका थिए।

त्यस्तै दोस्रो हाफको ५३औं मिनेटमा अलेक्जेन्डर मित्रोविचले गोल गर्दै सर्बियालाई ३–१ को अग्रता दिलाएका थिए। तर क्यामरुनका भिनसेन्ट अबोउबकर र इरिक म्याक्सिम चुपोमोटिङले खेलको ६३औं र ६६औं मिनेटमा गोल गर्दै खेललाई ३–३ को बराबरीमा ल्याए।

यो बराबरीसँगै दुवैले समान १–१ अंकका साथ विश्वकपमा खाता खोलेका छन्। यसअघिको खेलमा सर्बिया ब्राजिलसँग पराजित भएको थियो भने स्विट्जरल्यान्डले क्यामरुनलाई हराएको थियो।

ब्राजिलले आजै राति स्विट्जरल्यान्डको सामना गर्दैछ।