१० लाख नाघ्यो स्वतन्त्र पार्टीको समानुपातिक मत, प्रत्यक्षतर्फ कसको अवस्था कस्तो?

काठमाडौं– प्रतिनिधिसभा निर्वाचनअन्तर्गत समानुपातिकतर्फको चालू मतगणनामा राष्ट्रिय स्वतन्त्र पार्टीले १० लाख मत कटाएको छ। अहिलेसम्म स्वतन्त्र पार्टीले १० लाख आठ हजार मत ल्याएको छ। 

निर्वाचन आयोगका अनुसार अहिलेसम्म ८८ लाख ९५ हजार मत गणना भएको छ र मतगणना अन्तिम चरणमा प्रवेश गरेको छ।

सबैभन्दा पहिलो स्थानमा रहेको नेकपा एमालेले २४ लाख ४२ हजार मत ल्याएको छ। नेपाली कांग्रेसको मत एमालेको तुलनामा करिब एक लाख २० हजार कम छ। कांग्रेसले २३ लाख १९ हजार मत पाएको छ।

तेस्रो स्थानमा रहेको नेकपा माओवादी केन्द्रले १० लाख १६ हजार मत पाएको छ। राष्ट्रिय प्रजातन्त्र पार्टीले पाँच लाख २७ हजार मत पाएको छ।

जनता समाजवादी पार्टी नेपालले पनि समानुपातिक प्रणालीको सिटमा हिस्सा पाउने निश्चित भएको छ। जसपाले तीन लाख तीन हजार मत पाएको छ।

नेकपा एकीकृत समाजवादी समानुपातिकतर्फको थ्रेसहोल्ड पार गर्न संघर्षरत छ। उसले अहिलेसम्म दुई लाख ३९ हजार मत पाएको छ।

प्रत्यक्षतर्फ ५३ सिट जित्दै नेपाली कांग्रेस पहिलो स्थानमा छ। ३ स्थानमा उसले लिड गरिरहेको छ।

दोस्रो स्थानमा रहेको एमालेले ४१ सिट जितेको छ भने दुई स्थानमा अग्रता लिइरहेको छ। नेकपा माओवादी केन्द्रले १७ सिट जितेको छ भने नेकपा एकीकृत समाजवादीले १० सिट। 

राष्ट्रिय प्रजातन्त्र पार्टीले ७, राष्ट्रिय स्वतन्त्र पार्टीले ७, जनता समाजवादी पार्टीले ६, लोकतान्त्रिक समाजवादी पार्टीले ४ र नागरिक उन्मुक्ति पार्टीले ३ सिट जितेका छन्। 

नेपाल मजदुर किसान पार्टीले १ सिट जितेको छ भने जनमत पार्टीले १ सिट हासिल गरेको छ। राष्ट्रिय जनमोर्चाले पनि १ सिट जितेका छन् । 

स्वतन्त्र उम्मेदवारी दिएका ५ जनाले प्रतिनिधिसभामा जितेका छन्।