विश्वकपमा अफ्रिकी च्याम्पियनको पहिलो जित, आयोजकको लगातार दोस्रो हार

काठमाडौं- कतारमा जारी फिफा विश्वकपको दोस्रो चरणको दोस्रो खेलमा समूह 'ए'को सेनेगलले पहिलो जित निकालेको छ। सेनेगलले आयोजक कतारविरुद्ध ३-१ गोल अन्तरको जित निकालेको हो। 

अफ्रिकी च्याम्पियन सेनेगलको जितका लागि बुलाये दियेले ४१औँ मिनेटमा पहिलो गोल गर्दै सुरुवाती अग्रता दिलाए। त्यसको केही समय नबित्दै ४८औँ मिनेटमा फाम्रा दिदेले टिमका लागि दोस्रो गोल गरे। 

खेलको ७८औँ मिनेटमा कतारका मोहमद मोन्तरीले गोल फर्काउदै खेललाई २-१ को स्थितिमा पुर्‍याए। तर सेनेगलका बाम्बा डिङले खेलको ८४औँ मिनेटमा गोल थप्दै टिमलाई ३-१ बो बलियो स्थितिमा पुर्‍याए।

सेनेगल पहिलो खेलमा नेदरल्यान्डसँग २-० गोल अन्तरले पराजित भएको थियो। त्यस्तै आयोजक कतारको यो लगातार दोस्रो हार हो। पहिलो खेलमा कतार इक्वेडरसँग २-० ले पराजित भएको थियो। 

सेनेगलसँगको पराजयसँगै कतारको अन्तिम १६ मा पुग्ने सम्भावना कम बनेको छ। कतारसँगको खेल जितेसँगै सेनेगलले भने अन्तिम-१६ को आशा केही बढाएको छ।