देउवा र ओलीले प्रचण्डलाई दिए बधाई, मिलेर जान ओलीको प्रस्ताव

काठमाडौं- प्रधानमन्त्री एवम् नेपाली कांग्रेसका सभापति शेरबहादुर देउवाले नेपाल कम्युनिस्ट पार्टी माओवादी केन्द्रका अध्यक्ष पुष्पकमल दाहाललाई फोन गरेर बधाई दिएका छन्।

मंसिर ४ मा भएको प्रतिनिधि सभा तथा प्रदेश सभा निर्वाचनको परिणाम सार्वजनिक भइरहेका बेला देउवाले गोरखा-२ बाट चुनाव जितेका प्रचण्डलाई फोन गरी बधाई दिएका हुन्। 

प्रत्युत्तरमा प्रचण्डले पनि डडेल्धुराबाट सातौँ पटक निर्वाचित देउवालाई बधाई दिएका थिए। फोनमा उनीहरूले एकआपसमा बधाई साटासाट गरेको प्रचण्डका स्वकीय सचिवालयले जानकारी दिएको छ। 

यस्तै नेकपा एमालेका अध्यक्ष केपी शर्मा ओलीले पनि प्रचण्डलाई फोन गरी बधाई दिएका थिए। उनले मिलेर जानका लागि प्रचण्डसँग प्रस्ताव गरेको प्रचण्डको सचिवालयले जानकारी दिएको छ। प्रचण्ड सचिवालयका अनुसार ओलीले कम्युनिस्ट पार्टी मिलेर नजाँदा निर्वाचनमा धक्का लागेकोसमेत बताएका थिए।

जवाफमा प्रचण्डले ओलीकै भूमिकाका कारण छुट्टाछुट्टै स्थानमा पुग्नुपरेको बताएको उल्लेख गरिएको छ। 

फोन कुराकानीमा ओली र प्रचण्डले पनि बधाई साटासाट गरेका थिए।