गाली गरेको निहुँमा बालकको हत्या भएको खुलासा

धनगढी- बझाङको छबिस पाथीभेरा गाउँपालिका-७ मजखोरीका महेश बोहराका नौ वर्षीय छोरा कुशलको हत्या उनकै छिमेकीबाट भएको खुलेको छ। प्रहरीका अनुसार गाली गरेको निहुँमा उनको हत्या गरिएको हो।

सोही ठाउँका ध्वज बोहराका १७ वर्षीय छोरा तिलकले उनको हत्या गरेको स्वीकारेका छन्। तिलकले उनलाई चाउचाउ किन्न पठाएको र समयमै नफर्केपछि किन ढिला गरेको भनेर एक थप्पड लगाउँदा कुशलले गाली गरेपछि ढुंगाले हानेर हत्या गरेको बताएका छन्।

‘छाडा छाडा गाली गर्न थाल्यो, लात्ताले पेटमा हानेर ढलाएँ,’ तिलकले प्रहरीसँग भने, ‘त्यसपछि ढुंगै ढुंगाले हानें, ऊ बोल्न छोडेपछि मकैबारीमा लगेर ढुंगाले छोपिदिएँ।’ उनको हत्यामा संलग्न तिलक स्थानीय मजखोरी माविमा कक्षा-८ मा अध्यनरत छन्। 

स्कुलबाट फर्केपछि बुवाको मोबाइल लगेर कुशल खेल्दै तीजको कार्यक्रममा गएका थिए। बुधबार स्थानीय मजखोरी माविमा भएको तीजको कार्यक्रम हेर्न गएका उनको बिहीबार साँझ विद्यालयनजिकै मकैबारीमा शव फेला परेको थियो।

साँझसम्म छोरा घर नफर्केपछि स्थानीय बासिन्दाले राति अबेरसम्म कुशलको खोजी गरेका थिए। भोलिपल्ट ठूला-ठूला ढुंगाले राखेर छोपिएको तथा टाउको, गाला र शरीरका विभिन्न भागमा चोट लागेको अवस्थामा उनको शव भेटिएको थियो। कुशल स्थानीय पाथीभेरे लिटिल स्टार बोर्डिङमा यूकेजीमा अध्ययनरत थिए। डीएसपी प्रविन धितालका अनुसार कुशलको हत्या तिलकले नै गरेको निश्चित भइसकेको छ।