रेल सेवा चार दिन बन्द हुने

काठमाडौं– नेपाल रेल्वे कम्पनीले भोलि बिहीबारदेखि चार दिन रेल सेवा बन्द गर्ने भएको छ। आसन्न प्रतिनिधिसभा र प्रदेशसभा निर्वाचनका लागि मंसिर १ देखि ४ गतेसम्म रेल सेवा बन्द गरिएको नेपाल रेल्वे कम्पनीले जनाएको छ।

मंसिर ४ गते आइतबार हुन लागेको प्रतिनिधिसभा र प्रदेशसभा निर्वाचनलाई मध्यनजर गर्दै रेल सेवा बन्द गरिएको र मंसिर ५ गतेदेखि पुनः नियमित सञ्चालन हुने कम्पनीले सूचना जारी गरेको छ। हाल जनकपुरधामको कुर्थादेखि भारतको जयनगरसम्म रेल सेवा सञ्चालन हुँदै आएको छ।

यसैगरी जिल्ला प्रशासन कार्यालय धनुषाले मंसिर १ गते मध्यरातिदेखि मतदान सम्पन्न नभएसम्मका लागि भारतसँग जोडिएको सीमानाका बन्द गर्ने निर्णय गरेको छ।