नुवाकोटमा आमाछोरीको हत्या : एक जना पक्राउ, प्रहरीको अनुसन्धान जारी

नुवाकोट- नुवाकोटको दुप्चेश्वर गाउँपालिका-५ बालकुमारीको भङ्गेरीमा आमाछोरीको हत्या भएको घटनामा संलग्न रहेको आशंकामा प्रहरीले एक जनालाई पक्राउ गरेको छ।

दुप्चेश्वरकी २० वर्षीया सम्झना पाण्डे खतिवडा र उहाँकी तीन वर्षीया छोरी कृष्टिना खतिवडाको सोमबार बेलुका धारिलो हतियार प्रयोग गरी हत्या भएको थियो।

घटनामा संलग्न रहेको आरोपमामा प्रहरीले आज बिहान एक जनालाई पक्राउ गरेको छ। पक्राउ पर्नेमा सोही ठाउँका २१ वर्षीय पुष्कल भनिने सोनम तामाङ रहेका छन्।

ती व्यक्ति घरेलु हतियारसहित सम्झनाको घरतर्फ गएको, घटनास्थलमा उनले बोकेको घरेलु हतियार र उनको चप्पल भेटिएको अनुसन्धानबाट पाइएको जिल्ला प्रहरी कार्यालय नुवाकोटका प्रहरी नायब उपरीक्षक रुपक खड्काले जानकारी दिए। 

घटनालगत्तै उनी फरार रहेको पाएपछि काठमाडौंतर्फ जान लागेको समयमा आज बिहान पक्राउ गरिएको प्रहरीको भनाइ छ।

धारिलो हतियार प्रयोग गरेर घाँटीसहित शरीरको विभिन्न अङ्गमा गहिरो चोट पुर्‍याएर उनीहरूको हत्या गरेको अवस्थामा घरको आँगनमा आमा र पिँढीमा छोरीको शव फेला परेको थियो। प्रहरीले घटनाबारे अनुसन्धान जारी रहेको जनाएको छ।