राष्ट्रियता जोगाउन सत्ता गठबन्धनको जित आवश्यक : विमलेन्द्र निधि

सर्लाही- नेपाली कांग्रेसका पूर्वउपसभापति विमलेन्द्र निधिले एमालेका कारण राष्ट्रियता खतरामा परेको बताएका छन्। 

नेपाली कांग्रेस सप्तरीद्वारा पचगाछीमा आइतबार आयोजित चुनावी सभालाई सम्बोधन गर्दै नेता निधिले एमालेका कारण राष्ट्रियता खतरामा परेकाले मंसिर ४ को चुनावमा पाँच दलीय सत्ता गठबन्धलाई मतदान गर्न आह्वान गरेका हुन्।

एमाले नेतृत्वलाई प्रश्न गर्दै उनले भने, ‘कुनै मधेसीबाट राष्ट्रियता खतरामा छ?’ नागरिकता विहीन ७ लाख नेपालीलाई नागरिकता दिलाउन कांग्रेसले अघि बढाएको नागरिकतासम्बन्धी कानुन एमालेकै कारण अघि बढ्न नसकेको नेता निधिको भनाइ थियो।

संसदले पारित गराएर पठाएको नागरिकता विधेयक एमालेको उक्साहटमा राष्ट्रपतिले रोकेको भन्दै उनले ४ मंसिरको चुनावपछि राष्ट्रपति फेरेर भए पनि नागरिकता विधेयक स्वीकृत गराउने विश्वास दिलाए।

सर्लाही क्षेत्र नं ३ प्रदेश सभा ‘ख’ का उम्मेदवार हरेश महतोले सत्तागठबन्धनले जितेमात्र मधेसी जनताको अधिकार संरक्षण हुने बताए।