कांग्रेस बीपी, गणेशमानलाई बिर्सिएर प्रचण्डपथमा लाग्यो : रवीन्द्र मिश्र

काठमाडौं– राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्रले नेपाली कांग्रेस बीपी कोइराला र गणेशमान सिंहका सिद्धान्तबाट पछि हटेर माओवादी नेता पुष्पकमल दाहाल प्रचण्डपथमा लागेको आरोप लगाएका छन्।

शुक्रबार काठमाडौंको वसन्तपुर डबलीमा आयोजित राप्रपाको चुनावी सभालाई सम्बोधन गर्दै मिश्रले यस्तो बताएका हुन्। मिश्र काठमाडौं क्षेत्र–१ का प्रतिनिधिसभा उम्मेदवार हुन्।

उनले कांग्रेस बिग्रिएकै कारण आफूजस्ता पेसा, व्यवसाय अँगालिरहेकाहरू राजनीतिमा हाम फाल्नुपरेको बताए। उनले भने, ‘नेपाली कांग्रेस बीपीकरण  र गणेशमानकरण हुनुपर्नेमा प्रचण्डीकरण हुन पुग्यो। सोही कारण मजस्तो पेसामा लागेको मान्छे नेपालको राजनीतिको फोहोर पोखरीमा हाम फाल्नुपरेको छ।’

बहुदलको ३३ वर्ष बितिसक्दा पनि देशको अवस्थामा कुनै परिवर्तन आउन नसक्नुमा नेताहरूकै दोष रहेको उनले औंल्याए। सरकारमा जानेहरूले आफ्नो स्वार्थका लागि न्यायालयलाई गिजोलेको उनको आरोप छ।