डडेल्धुरा प्रशासनले भन्यो- सागरलाई अवरोध छैन

काठमाडौं- जिल्ला प्रशासन कार्यालय डडेल्धुराले आसन्न प्रतिनिधिसभा निर्वाचनमा स्वतन्त्र उम्मेदवारी दिएका सागर ढकाललाई कुनै पनि प्रकारको अवरोध नगरेको स्पष्ट पारेको छ। 

ढकालले आफूलाई चुनाव प्रचारप्रसारमा रोक लगाइएको भन्दै सामाजिक सञ्जालमा लेखेपछि प्रशासनले उक्त दाबीको खण्डन गर्दै उनलाई कुनै अवरोध नभएको स्पष्ट पारेको हो।  

‘निर्वाचन आचारसंहिताको पूर्ण पालना हुने गरी गरिने राजनीतिक दल र उम्मेदवारहरूको प्रचारप्रसार कार्यमा स्थानीय प्रहरी प्रशासनद्वारा कुनै पनि प्रकारको अवरोध नगरिएको र रोक नलगाइएको ब्यहोरा सबैलाई जानकारी गराइन्छ,’ प्रशासनको विज्ञप्तिमा भनिएको छ, ‘निर्वाचन आचारसंहितामा व्यवस्था भए बमोजिम प्रचारप्रसारको क्रममा स्थानीय प्रशासनलाई जानकारी गराई सञ्चालन गरिने प्रचारप्रसारका कार्यक्रमहरूमा संलग्न सम्पूर्ण राजनीतिक दल र उम्मेदवारहरूको आवश्यक सुरक्षाको प्रत्याभूति गरिने ब्यहोरासमेत सम्बन्धित सबैलाई जानकारी गराइन्छ।’ 

ढकालले सामाजिक सञ्जालमा प्रशासनले चुनावी प्रचारमा अवरोध गरेको बताएका थिए । उनी यसपटकको चुनावमा डडेल्धुरामा नेपाली कांग्रेसका सभापति तथा प्रधानमन्त्री शेरबहादुर देउवासँग प्रतिस्पर्धा गर्दैछन्।