डडेलधुरामा देउवाको उद्घोष– गठबन्धन लामो जान्छ, खगराज भट्ट मुख्यमन्त्री बन्नुहुन्छ

काठमाडौं– प्रधानमन्त्रीसमेत रहेका नेपाली कांग्रेसका सभापति शेरबहादुर देउवाले देश अहिले अप्ठ्यारोमा रहेको र कता जाने भन्ने अन्योल रहेको बताएका छन्।

डडेलधुराको परशुराम नगरपालिकामा आइतबार आयोजित चुनावी सभालाई सम्बोधन गर्दै देउवाले भने, ‘लामो लडाइँपछि ल्याएको लोकतान्त्रिक गणतन्त्रिक व्यवस्था हो। संघीय व्यवस्था ल्याएका छौं, यसलाई बचाउन जरुरी छ।’

केपी ओलीले संविधान च्यात्न खोजेको आरोप लगाउँदै देउवाले भने, ‘मध्य राति ओलीजीले संसद् भंग गर्नुभो। अति भयो भनेर हामीले मलाई प्रधानमन्त्री बनाएर देशलाई सही लिकमा ल्याएका छौं। संविधान र लोकतन्त्र बचाउन लागेका छौं।’

विगतमा आफूले प्रचण्डको मोल तोकेको कुरा सत्य भए पनि अहिले व्यवस्था फेरिएको बताए। उनले भने, ‘हो, मैले प्रचण्डको टाउकोको मोल तोकेकै हो। मलाई प्रचण्डले मार्न खोजेकै हो। तर, आज व्यवस्था फेरिएको छ। हामी सबैको जित भएको छ, हामी एक भएका छौं। देशलाई बचाउन अहिले गठबन्धनले जित्न आवश्यक छ।’ 

विगतमा आफूसँग लड्दै आएका खगराज भट्ट आगामी निर्वाचनपछि सुदूरपश्चिम सरकारको मुख्यमन्त्री बन्ने उद्घोष देउवाले गरे। उनले भने, ‘खगराज भट्ट यहाँको मुख्यमन्त्री हुनुहुनेछ। कुनै पनि हालतमा खगराजजीको जित आवश्यक छ। उहाँको जितपछि 

मुख्यमन्त्री भयो, भयो। मेरो पार्टीले मानेपछि भयो भयो।’

भट्ट डडेलधुराको प्रदेशसभा (क) उम्मेदवार हुन्। विगतका केही चुनावमा प्रतिनिधिसभामा देउवासँग लड्दै आएका माओवादीका भट्ट यसपटक भने कांग्रेसको साथ पाएपछि प्रदेशसभामा झरेका हुन्।