शिक्षित युवाको हातमा देशको समृद्धि : उमेश श्रेष्ठ

चितवन– चितवन क्षेत्र–२ का लोकतान्त्रिक वाम गठबन्धनका उम्मेदवार उमेश श्रेष्ठले शिक्षित युवाले मात्रै देशलाई समृद्धिको बाटोमा लैजान सक्ने बताएका छन्। शनिबार चुनावी अभियानका क्रममा इच्छाकामना गाउंँपालिकास्थित चुम्लिङटारमा युवा तथा विद्यार्थी भेटघाट कार्यक्रममा श्रेष्ठले शिक्षाबाट बेरोजगारी अन्त्य गर्न सकिने बताएका हुन्।

आफू पनि शिक्षा क्षेत्रबाटै स्थापित र  सफल भएकाले युवाहरू शिक्षित र उद्यमशील  हुनुपर्नेमा उनले जोड दिए। ‘तपाईंहरू शिक्षित हुनुस्। उद्यमशील बन्नुस्। मिहिनेत गर्नुस्। देशको समृद्धि तपाईंहरूको हातमा छ। त्यसैले एकमिनेट पनि खेर नफाल्नुस्,’ श्रेष्ठले भने। उनले युवा नै देशको मेरुदण्ड भएको बताए। देश बनाउने जिम्मेवारी र दायित्व युवाको भए पनि दैनिक २ हजार हाराहारी युवाहरू विदेशिनुपर्ने दुःखद विषय भएको उनको धारणा छ।

‘देशको जनसंख्यामा अधिकांश उत्पादनशील, उद्यमशील युवा हुनुहुन्छ। तपार्इंहरू आफूले जीवन खेर फाल्नुहुंँदैन। स्वदेशमै केही गर्नुपर्छ,’ श्रेष्ठले भने। युवाहरूले स्वरोजगार र आत्मनिर्भर बन्ने काम गर्नुपने भन्दै त्यसका लागि लोकतान्त्रिक वाम गठबन्धनलाई मत दिएर जिताउन आग्रह गरे। ‘युवाहरूले कार्यक्रम ल्याउनुस्, योजना ल्याउनुस्। हामी  तपाईंको साथमा छौं,’ श्रेष्ठले भने। देश र युवाहरूको  भविष्य उज्यालो पार्न पनि लोकतान्त्रिक वाम गठबन्धनको जित आवश्यक रहेको उनको दाबी थियो।