प्रतिस्पर्धी प्रधानमन्त्रीलाई स्वागत गर्न फूलमाला लिएर पुगे सागर ढकाल

डडेल्धुरा- डडेल्धुरामा प्रतिनिधिसभा सदस्यमा स्वतन्त्र उम्मेदवारी दिएका सागर ढकाल आफ्ना प्रतिस्पर्धीसमेत रहेका प्रधानमन्त्री एवं कांग्रेस सभापति शेरबहादुर देउवालाई स्वागत गर्न फूलमालासहित लाइन बसेका छन्।

देउवालाई हराउन मैदानमा उत्रिएका ढकाल उनकै स्वागतमा फूलमाला लिएर लाइनमा बसेको तस्बिर अहिले सामाजिक सञ्जालमा भाइरल बनेको छ। चुनावी प्रचारप्रसारका क्रममा बिहीबार डडेल्धुरा पुगेका देउवालाई स्वागत गर्न उनकै प्रतिस्पर्धी ढकाल माला लिएर लाइन बसेका हुन्। 

पछिल्लो समय उनी डडेल्धुरामा घरदैलो कार्यक्रम गरिरहेका ढकालले आफूलाई नागरिकले भव्य स्वागत गरेको र आफूले जित्ने बताउँदै आएका छन्। प्रधानमन्त्रीलाई स्वागत गरेको विषयमा उनले कुनै प्रतिक्रिया दिएका छैनन्।  

देउवा चार दिनसम्म गृहजिल्लामा बसेर मतदाता भेटघाट गर्ने कार्यक्रम छ। उनी २० कात्तिकमा काठमाडौं फर्कने छन्।