एमालेको चुनावी सभा शुक्रबारदेखि दार्चुलाबाट, ओलीले सम्बोधन गर्ने

काठमाडौं- नेकपा एमालेले चुनावी सभा पश्चिम नेपालबाट सुरु गर्ने भएको छ। एमालेले दार्चुलाको खलंगामा शुक्रबार चुनावी सभा गरेर अभियान सुरु गर्ने जनाएको छ।

त्यसका लागि एमाले अध्यक्ष केपी ओली शुक्रबार नै दार्चुला जाने भएका छन्। उनले शुक्रबार नै बैतडी र कञ्चनपुरमा हुने चुनावी सभालाई सम्बोधन गर्ने कार्यक्रम तय भएको एमालेले जनाएको छ। 

ओलीले चुनावी सभामा सहभागी हुन हेलिकोप्टर प्रयोग गर्न निर्वाचन आयोगबाट अनुमति लिइसकेका छन्।

सुदूरपश्चिम पश्चात ओली कर्णालीका सुर्खेत र दैलेखमा आयोजना हुने सभालाई सम्बोधन गर्नेछन्। त्यसपछि लुम्बिनीका चुनावी सभालाई सम्बोधन गर्ने ओलीले कम्तीमा १८ देखि २७ कात्तिकसम्म विभिन्न जिल्लाका चुनावी सभालाई सम्बोधन गर्ने कार्यतालिका रहेको छ।

एमाले केन्द्रीय प्रचार विभागका अनुसार ओलीले ९ दिनमा कम्तीमा ४० जिल्लाका चुनावी सभालाई सम्बोधन गर्ने एमालेको प्रारम्भिक कार्यतालिका तय भएको छ।