कांग्रेसको घोषणापत्र : ३ वर्षमुनि र ७३ वर्षमाथिका नागरिकलाई निःशुल्क उपचार

काठमाडौं– सत्तारुढ कांग्रेसले आगामी ४ मंसिरमा हुने प्रतिनिधिसभा र प्रदेशसभा निर्वाचनका लागि सार्वजनिक गरेको संकल्पपत्र नाम दिइएको घोषणापत्रमा ५ वर्षभित्र सबै नागरिकको स्वास्थ्य बिमा र बिमामार्फत गम्भीर प्रकृतिका रोगको उपचारको सुनिश्चितता गरिने बताइएको छ। 

३ वर्षमुनिका बालबालिका र ७३ वर्षमाथिका जेष्ठ नागरिकलाई निःशुल्क उपचार व्यवस्था गरिने कांग्रेसको घोषणापत्रमा उल्लेख छ। ‘गुणस्तरीय स्वास्थ्य सेवामा सहज पहुँचः सबैलाई स्वास्थ्य बिमा, सबल स्वास्थ्य प्रणाली’ उपशीर्षकमा कांग्रेसले भनेको छ, ‘३ वर्षमुनिका बालबालिका र ७३ वर्षमाथिका जेष्ठ नागरिकलाई निःशुल्क उपचार व्यवस्था गरिनेछ।’ बिमा रकमको दायरा बढाई १० लाख पु¥याइने, ज्येष्ठ नागरिक, अपांगता भएका व्यक्ति, अतिविपन्न, अतिअशक्त, एकल महिला, महिला तथा स्वास्थ्य स्वयंसेविकालाई निःशुल्क बिमा गरिने घोषणापत्रमा भनिएको छ। 

एकीकृत स्वास्थ्य पूर्वाधार मापदण्डअनुरूप पाँच वर्षभित्र स्वास्थ्य संस्था नभएका २ हजार ६०० वडामा आधारभूत स्वास्थ्य केन्द्र, सबै गाउँ–नगरपालिकामा विशेषज्ञ चिकित्सकसहितको प्राथमिक अस्पताल, सबै उपमहानगर र महानगरमा विशेषज्ञ सेवासहितको अस्पताल सञ्चालन गरिने कांग्रेसको घोषणापत्रमा उल्लेख छ।