प्रचण्डले दोहोर्‍याए तेस्रो पटक प्रधानमन्त्री बन्ने चाहना

गोरखा- नेकपा माओवादी केन्द्रका अध्यक्ष पुष्पकमल दाहाल प्रचण्डले पुन: प्रधानमन्त्री बन्ने चाहना दोहोर्‍याएका छन्। गोरखा आरुघाटमा भएको कार्यक्रमलाई सम्बोधन गर्दै आफूलाई प्रधानमन्त्रीका रूपमा जनताले देख्न चाहेको जिकिर गरेका हुन्। 

'यसअघि दुई-दुई पटक प्रधानमन्त्री भएँ। अहिले पनि देशभर घुम्दा जनताले फेरि मलाई हेर्न खोज्या जस्तो, मलाई देख्न खोज्या जस्तो, मलाई छुन खोज्या, मलाई सुन्न खोज्या जस्तो देख्छु,' उनको जिकिर थियो। यसअघि पनि उनले पटकपटक आफू प्रधानमन्त्री बन्ने चाहना व्यक्त गर्दै आएका छन्।  

गोरखाका दुवै क्षेत्र आफ्ना लागि उतिकै महत्वपूर्ण भएको दाबी गरेका थिए। दुवै क्षेत्रको विकासमा आफ्नो पार्टीको भूमिका खेल्ने प्रतिबद्धता व्यक्त गरे। 'घुम्दै फिर्दै फेरि म यही गोर्खा आइपुगेँ। गोरखाका जनतालाई सेवाको अवसर मलाई प्राप्त भएको ठानेको छु,' उनले भने। 

उम्मेदवारको मनोनयन गर्ने केही समयअघिसम्म आफू चितवन-३ बाट नै प्रतिनिधि सभा सदस्यका लागि उम्मेदवार बन्ने दाबी गर्दै आएका प्रचण्डले अन्तिम समयमा भने गोरखा-२ बाट उम्मेदवारी दर्ता गराएका छन्। उनलाई गठबन्धनका ५ दलको समर्थन छ। चितवनमा आफ्नो पक्षमा परिणाम हासिल गर्न नसक्ने भयले प्रचण्ड गोरखाबाट उठेको भन्दै उनको आलोचना पनि भइरहेको छ।