निर्वाचन आयोगका पदाधिकारीले राजनीति कब्जा गर्ने भ्रष्ट सिन्डिकेटको गुलामी गरे : डा केसी

काठमाडौं- चिकित्सा क्षेत्र सुधारका अभियन्ता डा गोविन्द केसी ‘नो नट अगेन’ अभियानको पक्षमा उभिएका छन्। डा केसीले बिहीबार एक विज्ञप्ति जारी गर्दै शीर्ष नेताविरुद्ध 'नो नट अगेन' अभियान चलाए ५ वर्षसम्म कैद र एक लाखसम्म जरीवाना हुने चेतावनी निर्वाचन आयोगले दिएपछि त्यसको विपक्षमा अहिंसात्मक अवज्ञा  गर्ने चेतावनी दिएका हुन्। राष्ट्रिय राजनीतिलाई वर्षौंदेखि कब्जा गरी बसेको भ्रष्ट सिन्डिकेटको निरन्तरताका लागि निर्वाचन आयोगका पदाधिकारीले पदीय दुरुपयोग गरी गुलामी गरेको आरोपसमेत लगाएका छन्। 

‘सामाजिक सञ्जाल प्रयोगकर्ताहरूलाई फौजदारी कानुनको दुरुपयोग गरी कडा सजाय गर्ने गराउने स्पष्ट मनसाय प्रकट गरी निर्वाचन आयोगले यही कात्तिक ८ गते जारी गरेको विज्ञप्तिप्रति हामी गम्भीर खेद प्रकट गर्न चाहन्छौं। वर्तमान राष्ट्रिय राजनीतिलाई वर्षौंदेखि कब्जा गरी बसेको भ्रष्ट सिन्डिकेटको निरन्तरताका लागि निर्वाचन आयोगका पदाधिकारीहरूले पदीय दुरुपयोग गरी गुलामी गरेको स्पष्ट हुन्छ,’ डा केसीले भनेका छन्।