रुपन्देही-२ : जनमुक्तिका केशवलाई गठबन्धनको समर्थन, एमालेका पौडेल हराउने दाबी

बुटवल- रुपन्देही–२  मा सत्ता गठबन्धनले नेकपा एमालेका विष्णु पौडेलविरुद्ध राष्ट्रिय जनमुक्ति पार्टीका केशवबहादुर थापालाई समर्थन गर्ने निर्णय गरेको छ। गठबन्धनबाट उम्मेदवार बनेका एकीकृत समाजवादीका राजु गुरुङको उम्मेदवारी खारेज गर्ने निर्वाचन आयोगको निर्णयलाई सर्वोच्च अदालतले सदर गरेपछि गठबन्धनले केशवलाई समर्थन गर्ने भएको हो। 

गुरुङको नाम कालोसूचीमा रहेको भन्दै निर्वाचन आयोगले असोज २५ गते उनको उम्मेदवारी खारेज गरेको थियो। आयोगले खारेज गरेपछि गुरुङ सर्वोच्च अदालत पुगेका थिए। सर्वोच्चले ३० गते अल्पकालीन अन्तरिम आदेश जारी गर्दै उम्मेदवारी कायम गरेपनि गत शुक्रबार सर्वोच्च अदालतका न्यायाधीश ईश्वरप्रसाद खतिवडा र कुमार रेग्मीको इजलासले निर्वाचन आयोेगको निर्णय सदर गरेपछि सत्तागठबन्धनले विकल्प खोजेका थियो। रुपन्देहीमा विभिन्न चरणमा भएको छलफलपछि केन्द्रीय तहबाट जनमुक्ति पार्टीलाई सघाउने गरी निर्णय भएको छ। 

बुधबार नेपाली कांग्रेसका सभापति शेरबहादुर केसी, नेकपा माओवादी केन्द्रका अध्यक्ष पुष्पकमल दाहाल प्रचण्ड, नेकपा एकीकृत समाजवादीका अध्यक्ष माधवकुमार नेपाल र राष्ट्रिय जनमोर्चाका अध्यक्ष चित्रबहादुर केसीले जनमुक्ति पार्टीका थापालाई समर्थन गर्ने निर्णय गरेका हुन्।

नेकपा एमालेका उपाध्यक्ष विष्णु पौडेलविरुद्ध उम्मेदवार नभएको भन्दै चर्चा भइरहेको बेला गठबन्धनले थापालाई समर्थन गर्ने निर्णयसँगै रुपन्देही २ मा फेरि चुनावी माहोल तात्ने भएको छ। जनमुक्तिका कार्यकारी अध्यक्ष समेत रहेका केशवले एक्लै लड्न तयार भएर मैदान ओर्लेका बेला ५ दलको समर्थन पाएपछि जित निकाल्न सहज हुने बताए। उनले एमालेका उपाध्यक्ष पौडेल भन्दा आफू अघि रहेको दाबी गरे।