अन्तिम ओभरमा विराटको जादु

भारत र पाकिस्तानबीच राजनीतिक द्वन्द्व अझै कायमै छ। जसले गर्दा भारत र पाकिस्तानको प्रतिस्पर्धालाई सामान्यतया खेलाडीसँग मात्रै सीमित मानिँदैन। यस खेललाई दुई देशका समर्थकहरूबीच पनि वैमनश्यता छ। एकआपसमा भिड्दै गर्दा दुवै टोलीका समर्थकलाई जय र पराजय प्रतिष्ठाको विषय बन्छ। 

यी दुई टोलीले अष्ट्रेलियामा जारी आइसीसी टी-२० विश्वकप क्रिकेटमा आइतबार बेलुका प्रतिस्पर्धा गरे। प्रतियोगिता अन्तर्गत सुपर १२ को खेलमा भारतले नाटकीय रुपमा पाकिस्तानलाई पराजित गर्‍यो। पूर्वकप्तान विराट कोहलीको सानदार ब्याटिङमा भारतले आइसीसी टी-२० विश्वकपमा पाकिस्तानमाथि ४ विकेटको रोमाञ्चक जित हात पारेको हो। जितको लागि १६० रनको प्रतिस्पर्धात्मक लक्ष्य पछ्याएको भारतले निर्धारित २० ओभरमा ६ विकेट गुमाउँदै पूरा गरेको हो। बलिङतर्फ पाकिस्तानका लागि पाकिस्तानका हरिस रौफले ४ ओभरमा २ विकेट लिए। त्यस्तै नसिम शाहले ४ ओभरमा १ र मोहम्मद नवाजले ४ ओभरमा १ विकेट लिए।

कोहलीले ५३ बलमा ६ चौका र ४ छक्कासहित ८२ रनमा अविजित रहँदै टिमलाई अप्रत्यासित जितमा पुर्‍याए। तेस्रो नम्बरमा प्रवेश गरेका उनी अन्तिमसम्मै टिकिरहे। त्यसअघि हार्दिक पान्ड्याले ३७ बलमा १ चौका र २ छक्कासहित ४० रनको महत्त्वपूर्ण योगदान दिए।