ओलीको ‘भाडाका बुद्धिजीवी’ शब्दप्रति कांग्रेसको आपत्ति

काठमाडौं– कांग्रेसको घोषणापत्र तयारी समितिले एमाले अध्यक्ष केपी ओलीको पछिल्लो अभिव्यक्तिप्रति आपत्ति जनाएको छ। ओलीले कांग्रेसको घोषणापत्र भाडाका बुद्धिजीवीले लेखिदिएको आरोप लगाएपछि समितिले आपत्ति जनाएको हो। 

‘प्रतिनिधिसभा र प्रदेशसभा निर्वाचन २०७९, घोषणापत्र तयारी समितिका प्रवक्ता सहमहामन्त्री जीवन परियारले पूर्वप्रधानमन्त्री भइसकेको व्यक्तिले अर्को पार्टीका जिम्मेवार व्यक्तिलाई भाडाका बुद्धिजीवी भन्नु अल्पज्ञान भएको प्रतिक्रिया दिए।

‘एमाले अध्यक्षजस्तो गरिमामय पदमा पुगिसकेको व्यक्ति, पूर्वप्रधानमन्त्रीले कांग्रेसका पदाधिकारी, केन्द्रीय सदस्य, महाधिवेशन प्रतिनिधि, महासमिति सदस्यलाई त्यस्तो आरोप लगाउनु भनेको अल्पदृष्टि र अल्पज्ञानको पराकाष्ठा हो,’ उनले भने। 

एमाले अध्यक्ष ओलीले झापा क्षेत्र–१ धुलाबारीमा बुधबार कांग्रेसको घोषणापत्र भाडाका बुद्धिजीवीले लेखिदिएको दाबी गरेका थिए।