निर्वाचन र लोकतन्त्रलाई दूषित पार्ने खाले सामग्री सम्प्रेषण नगर्न आग्रह

काठमाडौं– प्रमुख निर्वाचन आयुक्त दिनेशकुमार थपलियाले निर्वाचन र लोकतन्त्रलाई दूषित पार्ने खाले सामग्री सम्प्रेषण नगर्न सञ्चार माध्यम र सामाजिक सञ्जाल प्रयोगकर्तालाई आग्रह गरेका छन्।

निर्वाचन आयोगको आग्रहमा आगामी ४ मंसिरमा हुने प्रतिनिधिसभा र प्रदेशसभा निर्वाचनसन्दर्भमा सामाजिक सञ्जाल फेसबुकको मातृ संस्था मेटाले आयोजना गरेको सञ्चारकर्मी लक्षित भर्चुअल तालिमलाई सम्बोधन गर्दै प्रमुख आयुक्त थपलियाले सञ्चार माध्यम स्वनियमन र स्वनियन्त्रित हुनुपर्नेमा जोड दिँदै आएको उल्लेख गरे।

आयोगले निर्वाचन आचारसंहितामा पहिलो पटक मिथ्या सूचना, दुष्प्रचार र द्वेषपूर्ण अभिव्यक्तिलाई व्याख्या गरी त्यसको नियमनको प्रबन्ध गरेको जानकारी दिए। 

आयोगले सञ्चार माध्यम र सामाजिक सञ्जाललाई नियन्त्रण नभई नियमन गराउन खोजेकाले यसमा सबैको साथ आवश्यक रहको उनको भनाइ छ।

प्रमुख आयुक्त थपलियाले निर्वाचनको निष्ठा र स्वच्छता कायम गर्न तथा निर्वाचनसम्बन्धी सूचनालाई व्यवस्थित रूपमा सहजीकरणका लागि आयोगमा प्रेस कार्यालय स्थापना गरी काम भइरहेको बताए।