दिल्लीमा प्रचण्ड र मोदीबीच विशेष भेटवार्ता 

काठमाडौं : भारत भ्रमणमा रहेका नेकपाका अध्यक्ष पुष्पकमल दाहाल प्रचण्डले भारतीय प्रधानमन्त्री नरेन्द्र मोदीसँग विशेष भेटवार्ता गरेका छन् । 

बिहीबार दिल्ली पुगेका प्रचण्डले शनिबार दिउँसो मोदीसँग भेटवार्ता गरेका हुन् । भेटवार्तामा दुई देशबीचको सम्बन्ध र नेपालको पछिल्लो राजनीतिक अवस्थाबारे विस्तृत छलफल भएको बताइएको छ। 
बिमिस्टेक सम्मेलनपछि अचानक दिल्ली पुगेका प्रचण्डको भ्रमणलाई अर्थपूर्ण रुपमा हेरिएको छ । दिल्लीमा उनको भ्रमणलाई दिएको सम्मान र उच्चस्तरीय भेटवार्ताले राजनीतिक र कुटनीतिक दुवै वृत्तमा उनको भ्रमणलाई महत्वका साथ हेरिएको हो। 

शुक्रबार प्रचण्डले गृहमन्त्री राजनाथ सिंहलगायत भारतीय जनता पार्टीका नेताहरुसँग भेटवार्ता गरेका थिए । भेटमा दुई देशबीचको राजनीतिक, आर्थिक र सुरक्षाका विषयमा छलफल भएको बताइएको छ ।

प्रचण्ड दिल्ली पुगेकै दिन बेलुका भारतीय प्रधानमन्त्री नरेन्द्र मोदीका राष्ट्रिय सुरक्षा सल्लाहकार अजित डोभालले उनको सम्मानमा रात्रिभोज आयोजना गरेका थिए ।

भारतीय प्रधानमन्त्री मोदीसँगको भेटपछि प्रचण्डले भारतीय विदेश मन्त्री शुष्मा स्वराजलार्इ भेट्नुभएको छ । केहीबेर अघि शुरु भएको भेटवार्ता जारी छ ।