शर्माले सम्हाले नेपाली सेनाको कमान्ड

काठमाडौं– बलाधिकृत रथी प्रभुराम शर्माले कायममुकायम प्रधानसेनापतिका रूपमा नेपाली सेनाको नेतृत्व लिएका छन्। उनलाई जंगी अड्डामा सोमबार प्रधानसेनापति पूर्णचन्द्र थापाले नेतृत्व हस्तान्तरण गरेका हुन्। प्रधानसेनापति थापा र बलाधिकृत रथी शर्माबीच बुझबुझारथ पनि सम्पन्न भएको छ। 

साउन १७ गते राष्ट्रपति विद्यादेवी भण्डारीले शर्मालाई कायममुकायम प्रधानसेनापति तोकेकी थिइन्। सरकारको सिफारिसमा शर्मालाई कायममुकायम प्रधानसेनापति तोकिएको थियो। प्रधानसेनापति पूर्णचन्द्र थापाले २४ भदौबाट अनिवार्य अवकाश पाउँदै छन्। थापा बिदामा बस्ने भएपछि ज्येष्ठता क्रममा रहेका शर्मालाई कायममुकायम प्रधानसेनापति तोक्नका लागि सरकारले सिफारिस गरेको थियो। 

शर्मालाई २६ साउनदेखि लागू हुने गरी कायममुकायम प्रधानसेनापति तोकिएको थियो। प्रधानसेनापति अवकाश हुनुभन्दा एक महिनाअघि बिदामा बस्ने चलन छ। शर्मा एक महिनापछि स्वतः प्रधानसेनापति हुनेछन्।