आठ संवैधानिक आयोगले संयुक्त चुनावी अनुगमन गर्ने

काठमाडौं- आठ अधिकारमुखी संवैधानीक आयोगले आगामी मंसिर ४ गते हुने प्रतिनिधिसभा तथा प्रदेशसभा निर्वाचनको संयुक्त रूपमा अनुगमन तथा मूल्यांकन गर्ने भएका छन्।

राष्ट्रिय मानव अधिकार आयोग, मधेशी आयोग, महिला आयोग, थारु आयोग, समावेशी आयोग, मुस्लिम आयोग तथा दलित आयोगका अध्यक्षको बैठकले निर्वाचनको अनुगमनको लागि सबै आयोगले एउटा संयुक्त संयन्त्र बनाएर निर्वाचनको अनुगमन गर्ने निर्णय गरेको छ। बैठकले सोको मूल्यांकन गरी नेपाल सरकार समक्ष सिफारिस गर्ने निर्णय गरेको बताइएको छ।

निर्वाचनको बेला संवैधानिक आयोगको भूमिका महत्त्वपूर्ण हुने भएकोले नागरिकको स्वतन्त्रता, मौलिक अधिकार, मानवाधिकारलगायत विषयमा गम्भीर भएर साझा संयन्त्र बनाइ अनुगमन गर्ने निर्णय गरिएको छ।

बैठकमा मधेशी आयोगका अध्यक्ष डा. विजयकुमार दत्तले अहिलेको निर्वाचनमा मधेशी महिला, मधेशी दलितलगायतको उपस्थिति न्यून भएकोले समानुपातिक समावेशितामाथि नै प्रशन उठेको बताए।