चितवन–३ मा कांग्रेसका बागीलाई एमालेको समर्थन

काठमाडौं– नेकपा एमालेले चितवन क्षेत्र–३ मा आफ्नो उम्मेदवारी फिर्ता लिएर सत्तारुढ गठबन्धनबाट बागी बनेका उम्मेदवारलाई समर्थन गरेको  छ।

एमालेले रामप्रसाद न्यौपानेको उम्मेदवारी फिर्ता लिएर स्वतन्त्र उम्मेदवारी दिएका कांग्रेसका दिनेश कोइरालालाई समर्थन गरेको हो।

चितवनस्थित मुख्य निर्वाचन अधिकृतको कार्यालयमा एमाले अध्यक्ष केपी ओलीको हस्ताक्षरसहितको पत्र पठाएर न्यौपानेको उम्मेदवारी फिर्ता लिइएको छ।

सहायक निर्वाचन अधिकृत पुरुषोत्तम पौडेलले न्यौपानेको उम्मेदवारी फिर्ताको पत्र आएको तर आयोगको निर्णय भने बाँकी रहेको जानकारी दिए।

‘मलाई एमाले अध्यक्ष ओलीबाट आशीर्वाद प्राप्त भयो,’ कोइरालाले भने, ‘अब म आधिकारिक रूपमा एमालेको समर्थनमा उम्मेदवार बनें।’

कोइराला एमाले अध्यक्ष ओली भेट्न मंगलबार बेलुकी बालकोट गएका थिए। एमाले चितवन जिल्ला अध्यक्षसमेत रहेका न्यौपाने पनि टिकट फिर्ता नलिने भन्दै ओलीलाई भेट्न काठमाडौं आएका छन्।

चितवन–३ मा सत्ता गठबन्धनबाट नेकपा माओवादी केन्द्रका डा. भोजराज अधिकारी उम्मेदवार बनेका छन्।