बुटवल– रुपन्देहीमा राजनीतिक दलका शीर्ष नेतादेखि स्वतन्त्रसम्म गरी २ सय १२ जनाको उम्मेदवारी परेको छ। आगामी मंसिर ४ गते हुने प्रतिनिधिसभातर्फ ५ र प्रदेशसभा सदस्यतर्फ १० गरी १५ पदका लागि यो संख्यामा उम्मेदवारी परेको निर्वाचन आयोगले जनाएको छ।
प्रतिनिधिसभामा ५ निर्वाचन क्षेत्र रहेको रुपन्देहीमा ९४ जनाको उम्मेदवारी दर्ता भएको छ। प्रदेशमा १० निर्वाचन क्षेत्र रहेको रुपन्देहीमा १ सय १८ जनाको उम्मेदवारी दर्ता भएको जिल्ला निर्वाचन कार्यालय रुपन्देहीका सूचना अधिकारी टेकराज पन्थीले बताए।
प्रतिनिधिसभामा निर्वाचन क्षेत्र नम्बर १ नेकपा एमाले परित्याग गरेका घनश्याम भुसाल स्वतन्त्र र नेकपा एमालेबाट छविलाल विश्वकर्मा सहित २१ जनाको उम्मेदवारी परेको छ। भुसाललाई सत्तागठबन्धनले समर्थन गर्दै प्रतिनिधिसभामा उम्मेदवार उठाएका छैनन्।
प्रदेशसभा सदस्यतर्फ निर्वाचन क्षेत्र नम्बर १ को क बाट सत्ता गठबन्धनबाट नेपाली कांग्रेसका विश्वनाथ यादव, नेकपा एमालेको समर्थनमा राप्रपाका आशिष कुमार चौधरी, लोसपाबाट अनिल कुमार कुर्मी सहित ११ जनाको उम्मेदवारी दर्ता भएको छ। त्यसैगरी प्रदेशसभातर्फ १ को २ बाट सत्ता गठबन्धनबाट नेपाली कांग्रेसका अब्दुल रज्जाक, नेकपा एमालेका दधिराम न्यौपाने सहित १५ जनाको उम्मेदवारी दर्ता भएको छ।
निर्वाचन क्षेत्र नम्बर ३ मा प्रतिनिधिसभातर्फ सत्ता गठबन्धनबाट गृहमन्त्री समेत रहेका नेपाली कांग्रेसका केन्द्रीय सदस्य बालकृष्ण खाण, एमालेको समर्थनमा राप्रपाका नेता दीपक बोहोरा सहित २४ जनाको मनोनयन दर्ता भएको सूचना अधिकारी पन्थीले बताए।
प्रदेशसभातर्फ ३ को क बाट सत्ता गठबन्धनबाट लोसपाबाट सन्तोष कुमार पाण्डे, एमालेसँगको तालमेलमा जनता समाजवादी पार्टी नेपालका महेन्द्र राय यादव सहित १२ जनाको उम्मेदवारी परेको छ। यस्तै प्रदेशसभातर्फ ३ को ख बाट गठबन्धनबाट नेपाली कांग्रेसका रामचन्द्र ढकाल, नेकपा एमालेबाट तुलसी चौधरीसहित १२ जनाको उम्मेदवारी परेको छ।
यस्तै, प्रदेशसभामा ४ को ख बाट सत्ता गठबन्धनबाट नेपाली कांग्रेस वसिउद्धिन खाँ, लोकतान्त्रिक समाजवादी पार्टी नेपालका मोहनलाल यादव, जनता समाजवादी पार्टीबाट रामअवतार यादव सहित १२ जनाको उम्मेदवारी दर्ता भएको निर्वाचन आयोगले जनाएको छ।
यसैगरी प्रदेशसभातर्फ ५ को ख बाट सत्ता गठबन्धनबाट नेपाली कांग्रेसका फकरुद्धिन खाँ, नेकपा एमालेबाट रामचन्द्र यादव, जनमत पार्टीबाट चन्द्रकेश यादव, लोसपाबाट अबुल कैयम मुसलमान सहित १४ जनाको उम्मेदवारी परेको छ। आयोगका अनुसार प्रतिनिधिसभाका उम्मेदवार कमल भुसाल र वासुदेव घिमिरेविरुद्ध उजुरी परेको निर्वाचन आयोग रुपन्देहीले जनाएको छ।