दरबारमार्गस्थित प्लाटिनम क्लबका बाउन्सरमाथि खुकुरी हानेको आरोपमा ६ जना पक्राउ

काठमाडौं- दरबारमार्गस्थित प्लाटिनम क्लबका दुई जना बाउन्सरलाई खुकुरी प्रहार गरेको आरोपमा प्रहरीले ६ जनालाई पक्राउ गरेको छ। 

मंगलबार बिहान ४ बजेतिर क्लबको ड्युटी सकेर डेरा जाँदै गरेका दुई जनामाथि आठ जनाको समूहले खुकुरी प्रहार गरेको थियो। खुकुरी प्रहारपछि उक्त समूह फरार भएको थियो।

खुकुरी प्रहारबाट घाइते भएका नितेश राई र छिरिङ लामाको उपचार भइरहेको प्रहरीले जनाएको छ।

खुकुरी प्रहारमा संलग्नहरूलाई नियन्त्रणमा लिइएको प्रहरीको भनाइ छ। पक्राउ पर्नेमा सिन्धुपाल्चोकको बाह्रबिसे घर भएका दावा दोर्जे शेर्पा उर्फ च्याङ्बा, प्रदिप लामा, जीवन तामाङ र काभ्रेको मंगलटार घर भएका जितेन लामासहित ६ जना छन्। 

जिल्ला प्रहरी परिसर काठमाडौंको टोलीले पाँच जना र उपत्यका अपराध अनुसन्धान कार्यालयबाट खटिएका प्रहरीले एक जनालाई पक्राउ गरेको हो।

एक महिनाअघि प्लाटिनम क्लबका बाउन्सरसँग आरोपीहरूको झगडा भएको बताइएको छ।