कस्तो रहला देशका ठूला नदीमा बहाव?

काठमाडौं- हाल नेपालमा मनसुनी गतिविधि सक्रिय नै रहेको छ। मौसम पूर्वानुमान महाशाखाका अनुसार सक्रिय मनसुनका कारण आज प्रदेश १, मधेस, बागमती र गण्डकी प्रदेशमा आंशिकदेखि सामान्य बदलीको सम्भावना रहेको छ।

मनसुन सक्रिय रहेकाले बुधबार कोशी, कन्काई र कमला  तथा यसका सहायक नदीहरूमा बहाव केही बढ्ने बाढी पूर्वानुमान महाशाखाले जनाएको छ। 

महाशाखाले बुधबार बिहान एक बुलेटिन जारी गर्दै बाढीको पछिल्लो अवस्थाबारे जानकारी दिएको हो। 

महाशाखाले आगामी तीन दिन देशका अधिकांश नदीहरूमा बहाव सामान्य घट्ने र सतर्कता तह भन्दा तलै रहने पूर्वानुमान गरेको छ।

बुधबार इलाम, झापा, मोरङ, सुनसरी, सप्तरी, उदयपुर, धनुषा र आसपास भई बहने केही स–साना नदीहरूमा बहाव बढ्ने अनुमान गरिएको महाशाखाले जनाएको छ।

यस्तै, पाँचथर, तेह्रथुम, धनकुटा, ताप्लेजुङ। संखुवासभा, ओखलढुंगा, म्याग्दी, रुकुम पूर्व, रुकुम पश्चिम, जाजरकोट र आसपास भई बहने साना नदीहरूमा बहाव सामान्य बढ्ने महाशाखाले पूर्वानुमान गरेको छ।