बागी उम्मेदवारी फिर्ता लिन कांग्रेसको निर्देशन

काठमाडौं- नेपाली कांग्रेसले पार्टीका आधिकारिक उम्मेदवार तथा गठबन्धनका उम्मेदवारविरुद्ध बागी उम्मेदवारी दिएका पार्टीका सदस्यहरुलाई फिर्ता लिन निर्देशन दिएको छ। 

नेपाली कांग्रेसले मंगलबार एक विज्ञप्ति जारी गर्दै प्रतिनिधि सभा सदस्य र प्रदेश सभा सदस्य निर्वाचनमा गठबन्धन दलबीच सहमती भइ बनेका नेपाली कांग्रेसका आधिकारिक उम्मेदवार एवं गठबन्धन दलबीच सहमती भई बनेका गठबन्धन दलका आधिकारीक उम्मेदवारविरुद्ध पार्टीका कुनै सदस्यले बागी उम्मेदवारी दर्ता गरे- गराएको भए उक्त उम्मेदवारी फिर्ता लिन निर्देशन दिइएको जनाइएको छ। 

विज्ञप्तिमा भनिएको छ, 'पार्टीका कुनै सदस्यले बागी उम्मेदवारी दर्ता गरे- गराएको भए निर्वाचन आयोगद्वारा तोकिएको मिति र समय (२०७९ असोज २६ गते बिहान १० बजे देखि दिउसो १ बजे सम्म) उम्मेदवारी फिर्ता लिई पार्टीका आधिकारिक उम्मेदवार तथा गठबन्धन दलका उम्मेदवारहरुलाई विजय गराउन सक्रिय भूमिका निर्वाह गर्नहुन निर्णयानुसार निर्देशन गरिन्छ।'

तोकिएको समय सिमा भित्र आफ्नो उम्मेदवारी फिर्ता नलिएमा बागी उम्मेदवार र निजको प्रस्तावक र समर्थक पार्टीवाट स्वतः निष्कासित हुनेसमेत जनाइएको छ।