ओलीको अपरिपक्वताले अलपत्र परेका खिमलाल

बुटवल– रुपन्देहीको राजनीतिमा नेकपा एमालेको अपरिपक्वता पोखिएको छ। पार्टीभित्र अध्यक्ष केपी शर्मा ओलीका खरो आलोचक स्थायी कमिटी सदस्य घनश्याम भुसालले टिकट पाएनन्। 

टिकट नपाएपछि एमाले परित्याग गरी भुसालले रूपन्देही निर्वाचन क्षेत्र नम्बर १ बाट प्रतिनिधिसभा सदस्यको स्वतन्त्र उम्मेदवारी दिएका छन्। घटना यतिमा मात्रै सीमित भएन। रुपन्देहीको निर्वाचन क्षेत्र नम्बर ५ मा एमालेले २ जनालाई मनोनयन पत्र दिएपछि राष्ट्रियसभाका सचेतक खिमलाल भट्टराई अलपत्र परेका छन्।  

एमालेभित्र पार्टी अध्यक्ष ओली नै सर्वेसर्वा हुन्। रुपन्देहीको निर्वाचन क्षेत्र नम्बर ५ मा ओलीको भूमिका नाटकीय देखियो। तिलोत्तमा नगरपालिकाका निवर्तमान नगर प्रमुख वासुदेव घिमिरेलाई अध्यक्ष ओलीले मनोनयनका लागि रुपन्देही–५ मा उम्मेदवारीका लागि पत्र दिए। शनिबार पार्टीको आधिकारिक पत्र बुझेका घिमिरेले आइतबार अपराह्न साढे ३ बजे मनोनयन दर्ता गरे। 

एमाले पोलिटब्युरो सदस्य समेत रहेका खिमलाल भट्टराईले अर्को पत्र पेश गर्दै आइतबार अपराह्न पौने ५ बजे उम्मेदवारी दर्ता गराए।  एमालेका प्रभावशाली नेताहरु रहेको रुपन्देहीमा एमालेको अपरिपक्वताले राष्ट्रियसभामा एक सिट मात्रै गुमेको छैन, पार्टीभित्र समेत असन्तुष्टि बढाएको छ। 

त्यसो त घिमिरेले रुपन्देहीको निर्वाचन क्षेत्र नम्बर ३ मा दाबी गरेका थिए। एमालेले राप्रपासँग तालमेल गर्दा दीपक बोहोरालाई छोड्दा घिमिरे ५ मा जानुपरेको हो। २०७४ मा घनश्याम भुसालको अडानका कारण तिलोत्तमा नगरपालिकामा मेयरको टिकट पाएका घिमिरे पछि विष्णु पौडेल पक्षमा लागेका कारण टिकट पाएको एमाले वृत्तमा चर्चा हुन्छ। 

आधिकारिता पाएका घिमिरेले पार्टीको आधिकारिक उम्मेदवार आफू भएको बताएका छन्। उनले आफूले मनोनयन गरेपछि आधिकारिक भएको तर पछि अर्को पनि मनोनयन हुँदा रहेको विवाद सोमबार दिउँसोबाट साम्य भएको बताए। उनले ऐनले गल्तीलाई सच्याएको बताए। 

पार्टीका पदाधिकारी सहितका दर्जन नेता रहेको रुपन्देहीमा यो हदको अपरिपक्वता पत्रमा भनिएजस्तै भुलवश हो या नियोजित भन्नेमा शंका गर्ने ठाउँ रहेको कतिपय एमाले नेताहरुले बताएका छन्।