गठबन्धनलाई बलियो बनाउन वरिष्ठ नेता पौडेलको आग्रह

काठमाडौं– नेपाली कांग्रेसका वरिष्ठ नेता रामचन्द्र पौडेलले गठबन्धनलाई बलियो बनाएर निर्वाचनमा जान आग्रह गरेका छन्। नेपाली कांग्रेस तनहुँको कार्यालयमा आज बसेको गठबन्धनका दलका नेताहरुको बैठकमा वरिष्ठ नेता पौडेलले गठबन्धन अहिलेको आवश्यकता भएकाले गठबन्धनलाई बलियो बनाउनुको विकल्प नभएको बताए।

तनहुँका चार प्रदेशसभा क्षेत्रमा गठबन्धनको घटक नेकपा एकीकृत समाजवादीका तर्फबाट उम्मेदवारी दर्ता भएका विषयमा पौडेलले उम्मेदवारी फिर्ता लिएर सहयोग गर्न आग्रह गरे। ‘गठबन्धन जिल्लाबाट नभई केन्द्रबाटै भएको हो, यस विषयमा विचार गरेर उम्मेदवारी फिर्ता लिनुस्,’ पौडेलले भने।

वरिष्ठ नेता पौडेलले तनहुँ क्षेत्र नं १ को प्रतिनिधिसभा सदस्यका लागि उम्मेदवारी दर्ता गराएका छन्। प्रदेश क अन्तर्गत सत्तारुढ गठबन्धनतर्फ नेपाली कांग्रेसका अशोककुमार श्रेष्ठ र नेकपा माओवादी केन्द्रबाट हरिबहादुर चुमानले उम्मेदवारी दर्ता गराएका छन्। तनहुँका चार प्रदेशसभा क्षेत्रमा नेकपा एकीकृत समाजवादीको पनि उम्मेदवारी परेको छ। 

बैठकमा सत्तारुढ गठबन्धनको तर्फबाट प्रतिनिधिसभा सदस्य उम्मेदवार शंकर भण्डारी, प्रदेश क का उम्मेदवार राजेन्द्रकेशरी न्यौपाने, प्रदेश ख का उम्मेदवार जीतप्रकाश आले, नेपाली कांग्रेस केन्द्रीय सदस्य ध्रुव वाग्ले, नेकपा माओवादी केन्द्रका केन्द्रीय सदस्य आशा कोइरालालगायत नेताको उपस्थिति थियो।