समानुपातिक उम्मेदवार सूची बदल्न बालुवाटारमा कांग्रेस नेताहरुको छलफल

काठमाडौं– नेपाली कांग्रेसभित्र शेखर कोइराला समूहले पार्टी सभापति शेरबहादुर देउवाले समानुपातिकतर्फका उम्मेदवारमा एकलौटी गरेको आरोप लगाएपछि सभापति शेरबहादुर देउवासहितका शीर्ष नेताहरू बालुवाटारमा छलफलमा जुटेका छन्।

समानुपातिक उम्मेदवार सूची संशोधनलगायत नमिलेका विषय टुंग्याउन १० बजेदेखि बालुवाटारमा छलफल भइरहेको हो।

कांग्रेसले ३ असोजमा निर्वाचन आयोगमा बुझाएको प्रतिनिधिसभा र प्रदेशसभातर्फ समानुपातिक उम्मेदवारको बन्दसूचीमा समावेश गरिएका नामलाई लिएर पार्टीभित्रै विरोध भएपछि संशोधन गर्न लागिएको हो।

एक कांग्रेस नेताका अनुसार समानुपातिक उम्मेदवार सूची संशोधन गर्न सभापति देउवा सहमत भएकोले तीन दिनदेखि यो विषयमा छलफल भइरहेको छ।

आयोगले समानुपातिक उम्मेदवार सूची संशोधन गर्न १६ असोजसम्म दलहरूलाई समय दिएको छ।

कांग्रेस नेता शेखर कोइराला र महामन्त्री गगन थापा निकटले समानुपातिक उम्मेदवार तय गर्दा सभापति देउवा पक्षले एकलौटी गरेको आरोप लगाउँदै धर्नालगायत कार्यक्रम गरिरहेका छन्।

प्रतिनिधिसभातर्फ ११० जनाको नाम बन्दसूचीमा राख्दा कोइराला पक्षका १४ जनालाई मात्रै राखिएको थियो। सोही कारण कोइराला पक्षका नेताहरू असन्तुष्ट छन्।

कोइराला–थापा पक्षका केही नेताहरूको नाम समावेश गरेर समानुपातिक उम्मेदवार सूची संशोधन गर्ने तयारी भइरहेको कांग्रेसका एक नेताको भनाइ छ।