संगठित र एकढिक्का भएर चुनावमा जान नेता, कार्यकर्तालाई विवेकशील साझाको अपिल

काठमाडौं– विवेकशील साझा पार्टीले संगठित र एकढिक्का भई आउँदो चुनावमा होमिन नेता, कार्यकर्तालाई अपिल गरेको छ।

पार्टी अध्यक्ष समीक्षा बास्कोटाले भिडिओ अपिल जारी गर्दै विवेकशील साझा स्थापनाकालको प्रतिबद्धताअनुसार नै अगाडि बढिरहेको बताएकी हुन्।

विवेकशील साझा छाडेर निवर्तमान अध्यक्ष रवीन्द्र मिश्र राप्रपा प्रवेश गर्दै छन्। यसलाई सामान्य रूपमा लिन बास्कोटाले आग्रह गरेकी छन्।

‘पछिल्ला केही घटनाक्रम लगायत आमसञ्चार माध्यममा जुन हिसाबले विवेकशील साझा पार्टीलाई जोडेर केही समाचार आइरहेका छन्, त्यसमा सम्पूर्ण नागरिक, शुभेच्छुक र पार्टी सदस्य साथीहरूलाई म के भन्न चाहन्छु भने विवेकशील साझा पार्टी एकढिक्का भएर एकै ठाउँमा छौं,’ उनले भनेकी छन्।

उनले मिश्रको नाम नलिई पार्टी प्रवेशको कुरालाई सामान्य रूपमा लिन भनेकी छन्। ‘केही व्यक्तिको अमुक कुनै राजनीतिक दलमा प्रवेशलाई यहाँहरूले सामान्य रूपमा लिइदिनुहुन अनुरोध गर्न चाहन्छु,’ उनले भनेकी छन्।

उनले पार्टीको मर्म र मुल सिद्धान्त देशका नागरिकसामु गरिएका प्रतिबद्धतालाई नभुलीकन अगाडि बढ्ने बताएकी छन्। तराजु चिह्नसहित पार्टीले आगामी चुनावमा भाग लिने उनले स्पष्ट पारेकी छन्।