नेपाल आउँदै अमेरिकी मन्त्री ट्रुडो

काठमाडौं- अमेरिकी कार्यवहाक अमेरिकी सहायक विदेश मन्त्री एलिजावेथ केनेडी ट्रुडो बुधबार नेपाल आउने भएकी छन्। अमेरिकी विदेश मन्त्रालयले जारी गरेको विज्ञप्तिमा अमेरिकी सरकारको तर्फबाट विश्वव्यापी सार्वजनिक मामिला हेर्दै आएकी ट्रुडो २८ सेप्टेम्बरदेखि ८ अक्टोबरसम्मको भ्रमणमा निस्किएकी छन्। 

जस अन्तर्गत बुधबार नेपाल आइपुग्‍नेछन्। नेपालमा रहँदा मन्त्री ट्रुडोले सरकारी अधिकारी, नागरिक समाज, विदेशी मिडिया आउटलेटहरू, प्रेस, पत्रकार र कूटनीतिज्ञसँग भेट गर्नेछन्। उनले अल्पसंख्यक समुदायका अगुवा, अमेरिका गएर फर्किएका 'आल्मोनाई'हरुसँग समेत अन्तरक्रिया गर्ने बताइएको छ।

ट्रुडोले काठमाडौंमा रहँदा मिथ्या समाचार र सञ्चारमाध्यमको भूमिका विषयक अन्तर्क्रिया कार्यक्रममा समेत सहभागी हुने बताइएको छ। उनले नेपालसँगै उज्बेकिस्तान, संयुक्त अरब इमिरेट्स र काजकिस्तानको समेत भ्रमण गर्नेछन्। उनी १२ दिनको भ्रमणमा निस्किएकी हुन्।