सिट बाँडफाँट टुंग्याउन छलफलमा जुटे सत्तारुढ दलका शीर्ष नेता

काठमाडौं– आगामी मंसिर ४ गते हुन लागेको प्रतिनिधिसभा र प्रदेशसभा निर्वाचनका लागि सिट बाँडफाँटको टुंगो लगाउन सत्तारुढ दलका शीर्ष नेताहरूको बैठक बसिरहेको छ। पाँचदलीय गठबन्धनका शीर्ष नेताहरुको बैठक प्रधानमन्त्रीको सरकारी निवास बालुवाटारमा बैठक बसेको हो।

गठबन्धनमा रहेका दलहरुबीच प्रत्यक्षतर्फ कुन दलले कति सिट र कहाँ पाउने भन्ने विषय अझै टुंगिएको छैन। निर्वाचन आयोगले तोकेको समयसीमाअनुसार प्रदेश र प्रतिनिधिसभा निर्वाचनमा प्रत्यक्षतर्फको उमेदवारी दर्ता गर्न १२ दिनमात्र बाँकी छ। दुवै तहका लागि २३ असोजमा उम्मेदवारी मनोनयनको मिति तोकिएको छ।  

गठबन्धनले भने १६५ प्रतिनिधिसभा र ३३० प्रदेशसभा निर्वाचनका लागि सिट बाँडफाँटको टुंगो लगाउन सकेको छैन। अधिकांश स्थानमा सहमति भएको भनिए पनि यकिन तथ्यांक आउन सकेको छैन। शीर्ष नेताहरुले सिट बाँडफाँटका लागि कार्यदल गठन गरे पनि कार्यदलले आफ्नो काम नसकी प्रतिवेदन बुझाएको छ।