अछामका सीडीओ मरासेनी भन्छन्- पहिरोमा १२ जनाको शव भेटियो, ११ जना बेपत्ता छन्

अछाम- तीन दिनदेखिको वर्षाका कारण अछाममा गएको पहिरोमा परी १२ जनाको शव भेटिएको छ। शुक्रबार राति पहिरोमा परी बेपत्ता भएका ११ जनाको खोजी जारी रहेको अछामका प्रमुख जिल्ला अधिकारी विश्वराज मरासेनीले जानकारी दिए। 

'पहिरोबाट १२ जनाको शवको उद्धार गरिएको छ। थप ११ जनाको खोजी जारी छ,' प्रजिअ मरासेनीले नेपाल समयसँग भने, 'जनधनको क्षतिको विवरण संकलन भइरहेको छ। यसबारे विस्तृतमा हामी केही समयमा नै जानकारी गराउँछौँ।'

उनका अनुसार कमलबजार नगरपालिका–६ मा पहिरोले घर पुरिँदा बेपत्ता भएका ६ मध्ये ५ जनाको शव भेटिएको छ।  यस्तै ढकारी गाउँपालिका र तुर्माखाँद गाउँपालिकामा २/२ जनाको शव फेला परेको उनले जानकारी दिए। अन्य ३ शव जिल्लाका विभिन्न स्थानमा पहिरोमा पुरिएको अवस्थामा फेला परेको उनले बताए। बेपत्ताको खोजी कार्य भइरहेको र थप विवरण आउन बाँकी रहेको उनले बताए। 

पहिरो खसेका स्थानमा उद्धार र खोजी कार्यका लागि प्रहरी परिचालन गरिएको छ। पहिरोकै कारण विभिन्न स्थानमा सडक अवरुद्ध भएका छन्।