गुन्डागर्दीबाट कांग्रेस-एमालेमा ओत लागेकालाई टिकटको चिठ्ठा!

काठमाडौं- आगामी ४ मंसिरमा हुने प्रतिनिधिसभा र प्रदेशसभा निर्वाचनका लागि देशभरबाट उम्मेदवारको नाम सिफारिस भइरहेका छन्। जिल्ला-जिल्लाबाट विभिन्न दलका तल्ला कमिटीले धमाधम उम्मेदवारको नाम सिफारिस गरिरहेका छन्।

कांग्रेसले तल्लो तहबाट उम्मेदवारको नाम सिफारिस गर्ने काम सकिसकेको छ भने अन्य दलहरूले नाम सिफारिस गर्ने क्रममा छन्। राजनीतिकर्मी मात्र नभएर व्यवसायी, ठेकेदारदेखि आपराधिक र गुन्डागर्दीको पृष्ठभूमि भएकाहरू पनि दलहरूको सिफारिसमा परेका छन्।

अहिलेसम्म आपराधिक र गुन्डागर्दी पृष्ठभूमिबाट आएका झन्डै दर्जन व्यक्ति प्रतिनिधिसभा र प्रदेशसभा सदस्यको उम्मेदवार बन्न सिफारिसमा परेका छन्। हालसम्म प्राप्त तथ्यांकअनुसार कांग्रेस र प्रमुख प्रतिपक्षी एमालेले मात्र आपराधिक र गुन्डागर्दीबाट राजनीतिमा ओत लाग्न आएकाहरूलाई सिफारिस गरेको पाइएको छ।

तथ्यांकअनुसार कांग्रेसले बाहुबली पृष्ठभूमिका ७ जनाको नाम आउँदो चुनावमा उम्मेदवार बन्न सिफारिस गरेको छ भने एमालेले ३ जनालाई सिफारिस गरेको छ।