पाकिस्तानलाई २३ रनले पराजित गर्दै श्रीलङ्काले जित्यो एसिया कप

काठमाडौं- पाकिस्तानलाई २३ रनले पराजित गर्दै श्रीलङ्काले एसिया कप २०२२ को उपाधि जितेको छ। 

श्रीलङ्काले दिएको १ सय ७१ रनको लक्ष्य पछ्याएको पाकिस्तानले निर्धारित २० ओभरमा १ सय ४७ रनमात्र बनाउन सक्यो।

उसका लागि मोहम्मद रिजवानले ५५ र इफ्तिखर अहमेदले ३२ रन बनाए। बलिङतर्फ श्रीलङ्काका प्रमोद मदुशनले ४ र वानिन्दु हसरङ्गाले ३ विकेट लिए। 

दुबई अन्तर्राष्ट्रिय मैदानमा टस हारेर ब्याटिङको निम्तो पाएको श्रीलङ्काले निर्धारित २० ओभरमा ६ विकेट गुमाएर १ सय ७० रन बनाएको थियो। उसका लागि भानुका राजपक्षले नटआउट ७१ र वानिन्दु हसरङ्गाले ३६ रन बनाए। बलिङतर्फ पाकिस्तानका हरिस रौफले ३ विकेट लिए।  

योसँगै श्रीलङ्काले एसिया कप ६ पटक जितेको छ। एसिया कप अहिलेसम्म धेरै जित्नेमा भने भारत छ, उसले अहिलेसम्म ७ पटक जितेको छ। पाकिस्तानले भने २ पटक जितेको छ।