सबै नेतालाई एकै तौलमा जोखिनु अनुचित : नेता पौडेल

काठमाडौं–नेपाली कांग्रेसका वरिष्ठ नेता रामचन्द्र पौडेलले सबै पार्टी र सबै नेता एकै हुन् भनेर व्याख्या गर्नु अनुचित हुने बताएका छन्। शुक्रबार जनताको साथमा कांग्रेस अभियान समापन तथा बीपी जन्मजयन्ती अवसरमा तनहुँमा आज आयोजित कार्यक्रममा नेता पौडेलले सबै पार्टी र नेता उही ड्याङका मूला नभएको बताएका हुन्।

उनले भने, ‘सबै नेता भ्रष्टाचारी छैनन्। बदमास र गतिला सबै नेतालाई एकै तौलमा जोख्नु अनुचित हो।’ विचार र विवेक पुर्‍याएर जनताले नेता चयन गर्न सक्नुपर्ने उनको भनाइ छ।

जनतालाई अधिकार दिलाउने र गाउँको विकास गर्ने नेता तथा पार्टीलाई जनताले सहयोग गर्नुपर्ने उनले बताए। समाजमा कसको योगदान के छ भनेर हेरिनुपर्नेमा उनले जोड दिए। कांग्रेसमाथि बीपीका सिद्धान्त र बाटो छाडेको आरोप लाग्ने गरे पनि आफूहरूले त्यो बाटो नछाडेको उनको दाबी छ।

‘बीपीका आदर्श र सिद्धान्तमा कंैची लगाउनेहरूले उनको बाटो छाडेका हुन्। तर हामीले बीपीको बाटो छाडेनौं। संविधान बनाउनु पनि बीपीकै बाटो हिँडेको हो,’ उनले भने।