सर्वोच्च अदालतको न्यायाधीशमा ल क्याम्पसका प्रमुखसहित ३ जना सिफारिस

काठमाडौं- न्यायपरिषद्‌ले सर्वोच्च अदालतको न्यायाधीशका लागि तीन जनाको नाम सिफारिस गरेको छ। न्यायपरिषद्‌को मंगलबार बसेको बैठकले दुई जना उच्च अदालतका न्यायाधीश र एक जना ल क्याम्पसका प्रमुखलाई सर्वोच्चको न्यायाधीश नियुक्त गर्न सिफारिस गरेको हो। 

उच्च अदालतका मुख्य न्यायाधीश निता गौतम दिक्षित र न्यायाधीश विनोद शर्मा गौतमलाई सर्वोच्च अदालतको न्यायाधीशमा नियुक्त गर्न सिफारिस गरेको हो। 

यस्तै नेपाल ल क्याम्पसका प्रमुख डीएन पराजुलीलाई पनि सर्वोच्चको न्यायाधीश बनाउन सिफारिस गरिएको छ। सर्वोच्च अदालतका न्यायाधीश तेजबहादुर केसी र मीरा खड्काले अवकाश पाएका छन्।

त्यसैगरी हालका कामु प्रधानन्यायाधीश दिपक कार्की असोजमा अवकाश हुँदैछन्। निलम्बित प्रधानन्यायाधीश चोलेन्द्र शमशेर जबरा पनि मंसिरमा अनिवार्य अवकाश हुनेछन्।

यससँगै चार न्यायाधीशको पद रिक्त हुने भएको छ। सिफारिस भएका तीन न्यायाधीशको अब संसदीय सुनुवाई पछि नियुक्ति हुने भएको छ।