एसियाड: टेबल टेनिसमा नविता र स्यान्टुको जोडी पराजित

जाकर्ता- इन्डोनेसियामा जारी १८ औं एसियन गेम्स अर्न्तगत टेबल टेनिसको मिक्स डबल्स्मा नेपाल पराजित भएको छ। बुधबार भएको मिक्स डबल्स्को स्पर्धामा नेपालकी नविता श्रेष्ठ र स्यान्टु श्रेष्ठको जोडी तथा अमरलाल मल्ल र स्वेच्छा नेम्वाङको जोडी प्रि-क्वाटरफाइलमा पराजित भएको हो।

प्रि-क्वाटरफाइनलमा नविता र स्यान्टुको जोडी चीनका गाओ युयान लिन र म्यान वु वाङको जोडीसँग ३-१ को सेटमा पराजित भइन्। पहिलो र दोस्रो सेट ११-६ र ११-१ ले गुमाएपनि तेस्रो सेट स्यान्टु र नविताको जोडीले १३-११ ले जितेको थियो। तर चौथो सेट ११-७ ले गुमाउन पुग्यो। 

त्यसअघि यि दुई जोडीले मंगोलियाको टेमुलेन म्यान्डल र अन्डराम मखवातलाई १३-११, ११-७ र ११-९ को सेटमा पराजित गर्दै अन्तिम १६ मा पुग्न सफल भएका थिए। अर्को प्रि-क्वार्टरफाइनलमा अमरलाल मल्ल र स्वेच्छा नेम्वाङको जोडी हङकङकी चुन टिन वोङ र होइ किङ डुको जोडीसँग ११-४, ११-४ र ११-१ को सोझो सेटमा पराजित भयो।

यसअघि यो जोडीले कतारका अब्दुल रहमान नाग्गर र महा फारामार्जीको जोडीमाथि ३-२ को रोमाञ्चक जित निकाल्दै अन्तिम १६ मा पुग्न सफल भएका थिए।

शुरुवाती दुई सेट ८-११ र ७-११ ले गुमाएपनि त्यसपछि उत्कृष्ट पूनरागमन गर्दै तीनै सेट क्रमशः ११-५, ११-६ र ११-४ ले आफ्नो पक्षमा पार्दै प्रि–क्वाटरफाइनलमा स्थान बनाएका थिए ।