एसियन कप छनोटमा नेपाल ओमनसँग पराजित

काठमाडौं–मलेसियामा जारी एसियन कप छनोट क्रिकेटमा नेपाल आफ्नो पहिलो खेलमा पराजित भएको छ । नेपाल आफ्नो पहिलो खेलमा ओमनसँग सात विकेटले पराजित भएको हो । 

नेपालले दिएको दुई सय २२ रनको लक्ष्य पछ्याएको ओमनले ४८ ओभरमा ३ विकेट गुमाउदै लक्ष्य भेट्टायो । पहिले टस हारेर ब्याटिङको निम्तो पाएको नेपालले निर्धारित ओभरमा ९ विकेट गुमाउदै २ सय २१ रन जोडेको थियो ।

ओमनका खावर अलीले सर्वाधिक ८४ रन जोड्दै अविजित रहे । त्यस्तै जिसान मक्सुदले ४५ रनमा अविजित रहदा वैभब वाटेगोन्करले ४१, जतिन्दर सिंहले ३० र अक्युब ल्यासले १६ रन जोडे । नेपालका लागि कप्तान पारस खड्काले एक विकेट लिए ।  जतिन्दर र वैभब रनआउट भएका थिए ।

यसअघि नेपालका लागि सागर पुनले अर्धशतकीय पारी खेल्दै सर्वाधिक रन जोडेका थिए । उनले ८४ बल खेल्दै छ चौका र दुई छक्काको मद्दतमा ८३ रन जोडेका थिए । त्यस्तै उपकप्तान ज्ञनेन्द्र मल्ल अर्धशतक बनाउनबाट ५ रनले चुके । 

मल्लले ६० बलमा ६ चौका र एक छक्काको मद्दतमा ४५ रज जोडेका थिए । मध्येक्रममा मैदान प्रवेश गरेका आरिफ सेख र पुनको जोडीले धरमराएको नेपाली ब्याटिङलाई उकासेका थिए । आरिफले ७४ बल खेल्दै तीन चौकाको मद्दतमा ३६ रन जोडे । 

अन्तिम दोस्रो ओभरमा मैदान प्रवेश गरेका करन केसीले बिस्पोटक ब्याटिङ गर्दै १० बलमा २६ रन जोडे । उनले १० बलमा दुई छक्का र एक चौका प्रहार गरे । नेपालका अन्ये ब्याट्सम्यानले भने दोहोरो अंकछुन सकेनन् । 

ओमनका लागि बिलाल खान, मोहमद नदिम र अजय लालचेताले समान दुई–दुई विकेट लिए ।