जाजरकोट- रुकुम पश्चिममा पहिरोमा परिएर आमा र छोरीको ज्यान गएको छ। पहिरोमा परी अर्की छोरी घाइते भएकी छन्।
आइतबार जाजरकोट भेरी नगरपालिका-१ मैदेकी ३० वर्षीया बालमती राना र उनकी २ वर्षीया प्रतीक्षा रानाको मृत्यु भएको हो।
बालमतीकी ७ वर्षीया छोरी तिर्सना घाइते भएको जिल्ला प्रहरी कार्यालय रुकुम पश्चिमले जनाएको छ। अहिले तिर्सनाको जाजकोट जिल्ला अस्पतालमा उपचार भइरहेको छ। अहिले उनी खतरामुक्त रहेकी प्रहरीले जनाएको छ।
आइतबार दुई छोरीसँगै जाजरकोटको नलगाड नगरपालिका-१ स्थित माइतीबाट रुकुम पश्चिम हुँदै घरतर्फ फर्कदै गरेका बालमती र उनकी छोरी पानी परेपछि रुकुमपश्चिम आठबीसकोट नगरपालिका-१४ पिपलचौरस्थित छेपारे सामुदायिक वनको भवनमा बसेका थिए।
सोही क्रममा दिउँसो साढे ३ बजे माथिबाट आएको पहिरोले उनीहरूलाई पुरेको थियो।