इजरायली गुप्तचर प्रमुख र अमेरिकी अधिकारीबीच भेटवार्ता हुने

तेलअभिभ- इजरायलको मोसाद जासुसी एजेन्सीका प्रमुखले इरानसँगको आणविक सम्झौताको पुनरुत्थान वाताबारे छलफलका लागि सेप्टेम्बरको सुरुमा संयुक्त राज्य अमेरिकाको भ्रमण गर्ने भएका छन्। तेहरानसँग सन् २०१५ मा भएको ऐतिहासिक सम्झौतामा फर्कन पश्चिमा शक्तिहरूलाई पन्छाउने यहूदी राज्यको प्रयासपछिको हुनलागेको पछिल्लो भ्रमण हो।

इजरायलले यो सम्झौताले इरान समर्थित लडाकूलाई आर्थिक सहयोग गर्न सहज बनाउने र तेहरानलाई आणविक अस्त्र विकास गर्नबाट नरोक्ने बताएको छ। मोसादका प्रमुख डेभिड बार्नेया इरान सम्झौताबारे अमेरिकी संसदको बैठकमा भाग लिन एक हप्ताभित्र वासिङ्टनको भ्रमण गर्नुहुनेछ,' नाम नबताउने शर्तमा इजरायलका एक वरिष्ठ अधिकारीले एएफपीलाई बताए।

यसअघि आइतबार इजरायलका प्रधानमन्त्री याइर लापिडले सम्झौताविरुद्ध इजरायलको ‘कुटनीतिक लडाईं’मा इजरायलका राष्ट्रिय सुरक्षा सल्लाहकार र रक्षामन्त्रीले हालै संयुक्त राज्य अमेरिकामा बैठक गरेको बताएका थिए। 

'हामी अमेरिकी र युरोपेलीहरूले यस सम्झौतामा समावेश खतराहरू बुझ्न सुनिश्चित गर्न ठोस प्रयास गरिरहेका छौं,' लापिडले भने, 'सन् २०१५ मा हस्ताक्षर गरिएको सम्झौता ‘राम्रो सम्झौता होइन’ र हाल तयार भइरहेको सम्झौताले ‘ठूलो खतरा’ निम्त्याउनेछ।'

सन् २०१८ मा तत्कालीन अमेरिकी राष्ट्रपति डोनाल्ड ट्रम्पले इरानलाई आणविक हतियार विकास गर्नबाट रोक्ने उद्देश्यले गरिएको सम्झौताबाट एकतर्फी रुपमा पछि हटेका थिए। उनका उत्तराधिकारी जो बाइडनले सम्झौतामा फर्कन चाहेका छन् र लगभग डेढ वर्षको वार्तापछि हालैको प्रगतिले यहूदी राज्य इजरायललाई किनारामा पारेको छ।

लापिडका अनुसार नयाँ सम्झौतामा म्याद समाप्त हुने मिति र कडा पर्यवेक्षण समावेश गर्नुपर्नेछ जसले ‘इरानको ब्यालेस्टिक क्षेप्यास्त्र कार्यक्रम र मध्यपूर्वभरि आतंकवादमा उसको संलग्नता’लाई सम्बोधन गर्नेछ।

गत बुधबार लापिडले नयाँ सम्झौताले इरानलाई प्रतिवर्ष १०० अर्ब अमेरिकी डलर दिने र इरान समर्थित लडाकू समूह हमास, हिजबुल्लाह र इस्लामिक जिहादले प्रयोग गर्ने बताएका थिए।