सागरको अर्धशतकमा नेपालले ओमनलाई दियो २२२ रनको लक्ष्य

काठमाडौं- मलेसियामा जारी एसियन कप क्रिकेट छनोटमा नेपालले आफ्नो पहिलो खेलमा ओमनलाई दुई सय २२ रनको लक्ष्य सुम्पेको छ । पहिले टस हारेर ब्याटिङको निम्तो पाएको नेपालले ९ विकेट गुमाउदै दुई सय २१ रन जोडेको थियो । 

नेपालका लागि सागर पुनले अर्धशतकिय पारी खेले । उनले ८४ बल खेल्दै छ चौका र दुई छक्काको मद्दतमा ८३ रन जोडे । त्यस्तै उपकप्तान ज्ञनेन्द्र मल्ल अर्धशतक बनाउनबाट ५ रनले चुके । मल्लले ६० बलमा ६ चौका र एक छक्काको मद्दतमा ४५ रज जोड्दै आउट हुन पुगे । 

मध्यक्रममा मैदान प्रवेश गरेका आरिफ सेख र पुनको जोडीले धरमराएको नेपाली ब्याटिङलाई उकासेका थिए । आरिफले ७४ बल खेल्दै तीन चौकाको मद्दतमा ३६ रन जोडे । अन्तिम दोस्रो ओभरमा मैदान प्रवेश गरेका करन केसीले बिस्फोटक ब्याटिङ गर्दै १० बलमा २६ रन जोडे । उनले १० बलमा दुई छक्का र एक चौका प्रहार गरेका थिए । नेपालका लागि अन्य ब्याट्स म्यानले दोहोरो अंक छुन सकेनन् । 

नेपालले ८.१ ओभरमा ३१ रन जोड्दा पहिलो विकेटको रुपमा ओपनर सुवास खकुरेललाई गुमाउन पुगेका थियो । उनले १५ बलमा ४ रन मात्र जोड्न सके । त्यस्तै १५.५ ओरमा ५६ रन पुग्दा कप्तान पारस खड्काले २४ बलमा ८ जोड्दै  आउट भए । तेस्रो विकेटका रुपमा ज्ञानेन्द्रलाई गुमाउँदा मैदान प्रवेश गरेका दिपेन्द्र सिंह ऐरि १६ बलमा ९ रनमा आउट भए ।

ओमनका लागि बिलाल खान, मोहमद नदिम र अजय लालचेताले समान दुई–दुई विकेट लिए ।