टोटेनह्यामको सानदार जित

एजेन्सी–इंग्लिस प्रिमियर लिग अन्तर्गत सोमबार रातीको खेलमा टोटेनह्याम हट्सपरले म्यानचेस्टर युनाइटेडलाई ३–० ले पराजित गरेको छ । घरेलु मैदान ओल्ड ट्राफर्डमा म्यानचेस्टर युनाइटेडले पहिलो हाफ निकै राम्रो प्रदर्शन गरेको थियो । तर, दोस्रो हाफमा ने तीन गोल खान पुग्यो ।

रोमेलु लुकाकुले पहिलो हाफमा सुवर्ण अवसर खेर फालेका थिए । गोलरक्षक समेत बिट भइसकेको अवस्थामा उनले खाली पोस्टमा गोल गर्न नसक्दा युनाइटेड अग्रता लिनबाट चुकेको थियो । प्रशिक्षक जोसे मोउरिन्होले एलेक्सिस सान्चेजलाई बेन्चमा राखेपछि युनाइटेड आक्रमणमा केहि फितलो देखिएको थियो ।

दोस्रो हाफको सुरुमै टोटेनहमले अग्रता लिन सफल भयो । काइरान ट्रीपिएरको कर्नरमा फरवार्ड ह्यारी केनले हेडरमार्फत गोल गर्दै पाहुना टोलीलाई अगाडी बढाए । त्यसको दुई मिनेटमै लुकास मोउराले गोल गर्दै स्पर्सको अग्रता दोब्बर पारे । 

खेलको अन्त्यतिर मोउराले व्यक्तिगत दोस्रो गोल गर्दै ३–० को जित पक्का गरे । खेल अवधिभर युनाइटेडको डिफेन्सले लगातार गल्ति गर्दा स्पर्सलाई खेलमा अगाडी बढ्न सहज भएको थियो ।