शीतलनिवासबाट नागरिकता विधेयक पुनः फिर्ता आए फेरि पठाउँछौं : सञ्चारमन्त्री कार्की

काठमाडौं– सञ्चार तथा सूचना प्रविधिमन्त्री एवं सरकारका प्रवक्ता ज्ञानेन्द्रबहादुर कार्कीले नागरिकता विधेयक जस्ताको तस्तै पारित हुने बताएका छन्। शनिबार सुनसरीको वराहक्षेत्र नगरपालिका– १० मा नेपाल टेलिकमको फाइबर नेट सेवा उद्घाटन गर्दै मन्त्री कार्कीले यस्तो दाबी गरेका हुन्।

संसद्ले पारित गरी प्रमाणीकरणका लागि राष्ट्रपतिसमक्ष पठाएको विधेयक फिर्ता आए पुनः पठाइने उनले बताए। यस पटक नागरिक विधेयक जस्ताको तयस्तै पारित हुने विश्वास व्यक्त गरे। 

मुलुकलाई एकता, सद्भाव र आन्तरिक एकतालाई अझ मजबुत गरेर जानुपर्ने उनको धारणा छ। उनले राष्ट्रपतिलाई फेरि विधेयकलाई फिर्ता गर्ने संवैधानिक अधिकार रहेको तर राष्ट्रपति संस्थाबाट गल्ती नहुनेमा सरकार विश्वस्त रहेको सुनाए।

मन्त्री कार्कीले भने, ‘नागरिकता विधेयकलाई संसद्को दुवै सदनबाट पारित गराएर राष्ट्रपतिकहाँ प्रमाणीकरणका लागि पठाइएको थियो। तर अहिले राष्ट्रपतिले केही सुझावसहित त्यो विधेयकलाई फिर्ता गर्नुभएको छ। त्यो विधेयकलाई फेरि प्रतिनिधिसभाले पारित गरेको छ। अब राष्ट्रिय सभामा पारित हुनेछ।’ उनले संसद् र राष्ट्रपतिबीच टकराव हुनु ठीक नभएको बताए।