गठबन्धनले अस्तव्यस्त बनाउँछ, चुनाव एक्लै लडौं : सिर्जना सिंह

काठमाडौं– गत स्थानीय तह चुनावमा नेपाली कांग्रेसबाट काठमाडौं महानगरको मेयरमा पराजित प्रकाशमान सिंहपत्नी सिर्जना सिंहले आगामी ४ मंसिरमा हुने प्रतिनिधिसभा र प्रदेशसभाको चुनावमा पार्टीलाई गठबन्धन नगरी चुनावमा जान सुझाएकी छन्।

सिंहले  ट्वीटरमा सुझाव दिँदै लेखेकी छन्, ‘आउँदै गरेको संसदीय चुनावमा आ–आफ्नो पार्टी, आफ्नै चुनाव चिह्न र गठबन्धन नगरी सबैले आ–आफ्ना उम्मेदवार उठाऔं। बरु बहुमत नआए गठबन्धन गर्दा हुन्छ।’ 

सत्तामा रहेका पाँच दलले आउँदो चुनावमा गठबन्धन गर्ने निर्णय गरी कार्यदल बनाएर चुनावी सिट बाँडफाँटका लागि प्रयास गरिरहेका छन्। सिर्जना आफैं स्थानीय चुनावमा माओवादीसँग चुनावी तालमेल गरेर उम्मेदवार भएकी थिइन्। 

उनले स्थानीय चुनावमा भोगेको अनुभव भन्दै गठबन्धनले अन्योल र अस्तव्यस्तबाहेक केही नगर्ने बताएकी छन्। उनले लेखेकी छन्, ‘स्थानीय चुनावमा देखे/भोगेको गठबन्धनले अन्योल र अस्तव्यस्तबाहेक केही गर्दैन।’ बहुमत नआए चुनावपछि गठबन्धन गर्दा उपयुक्त हुने उनले सुझाएकी छन्।