अभ्यास खेलमा नेपालको लगातार दोस्रो जित

काठमाडौं–एसिया कप छनोटको तयारीमा श्रीलंका भ्रमणमा पुगेको नेपाली राष्ट्रिय क्रिकेट टोलीले आफ्नो दोस्रो अभ्यास खेलमा पनि जित निकालेको छ । शुक्रबार भएको खेलमा नेपालले श्रीलंकाको फस्ट क्लास क्लब ब्लुमफिल्ड क्लबलाई डकवर्थ लेविस (डिएल) पद्दतिको आधारमा १७६ रनले हराएको हो ।

यसअघि टस जितेर पहिले ब्याटिङ गरेको नेपालले पुरै ५० ओभर खेल्दै ८ विकेट गुमाएर तीस सय २३ रन बनाएको थियो । तीन सय २४ रनको लक्ष्य पछ्याएको ब्लुमफिल्डले ३८ ओभरमा ९ विकेट गुमाउँदै १ सय ३४ रन मात्र बनाउन सकेको थियो । तर, ब्याड लाइटिङका कारण खेल रद्ध भएपछि नेपालले डिएल पद्दतिको आधारमा १७६ रनले जित हाल पारेको  हो । 

नेपालका लागि सागर पनुनले तीन, ललित भण्डारीले दुई तथा कप्तान पारस खड्का र ललित राजवंशीले समान एक एक विकेट लिए । 

त्यष्सअघि नेपालको उच्च योगफलमा दिपेन्द्रसिंह ऐरीले शतकीय पारी खेले । दिपेन्द्रले ९६ बलमा १२१ रन बनाए । यस्तै सागर पुनले ८२ बल खेल्दै ९२ रनको योगदान दिए । त्यसबाहेक नेपालका कप्तान पारस खड्काले २३ बलमा २३ रन बनाए भने करण केसीले २६ र अनिल कुमार शाहले १७ रनको योगदान दिए । 

मलेसियामा अगष्ट अन्तिम साताबाट आयोजना हुने एसिया कपको तयारीमा रहेको नेपालले श्रीलंकामा अभ्यास खेल खेलिरहेको हो । नेपालले अब अन्तिम अभ्यास खेलमा कोल्ट्ससंग आइतबार उसैको मैदानमा खेल्ने छ । यसअघि नेपालले पहिलो अभ्यास खेलमा श्रीलंका आर्मी स्पोर्ट्स क्लबलाई ६७ रनले हराएको थियो ।  तीन अभ्यास खेलपछि नेपाली टोली अगष्ट २७ मा श्रीलंकाबाटै मलेसिया प्रस्थान गर्ने छन् ।