श्रीमान्-श्रीमतीसहित चार लागूऔषध कारोबारी पक्राउ

सुनसरी- लागूऔषध ब्राउन सुगरको कारोबारमा संलग्न चार जनालाई प्रहरीले पक्राउ गरेको छ।

पक्राउ पर्नेमा इटहरी उपमहनगरपालिका-४ बस्ने २७ वर्षीया सृजना ओझा, सोही स्थानका २८ वर्षीय सुशान्त घिमिरे, धनकुटा शहीद भूमी गाँउपालिका-५ का ३४ वर्षीय विर्तसिंह राई र उनकी श्रीमती ३५ वर्षीया पवित्रा राई रहेका छन्।

गत २० गते बेलुका इलाका प्रहरी कार्यालय इटहरीबाट खटिएको प्रहरी टोलीले ब्राउन सुगरको कारोबार भइरहेको सूचनाको आधारमा इटहरी-६ स्थित भाटे एण्ड खाजा घरबाट ब्राउन सुगर १ ग्राम १५० मिलि ग्राम, ७ हजार नगदसहित सृजना ओझा र सुशान्त घिमिरेलाई पक्राउ गरिएको थियो।

उनीहरूबाट विर्तसिंह राई र उनकी श्रीमती पवित्रा राईबाट ब्राउन सुगर खरिद गरिएको भन्ने कुरा सूचनाका आधारमा प्रहरीले विर्तसिंहलाई इटहरी उपमहानगरपालिका-५ मा फेला पारी शरीर तलासी लिँदा ब्राउन सुगर ६ ग्राम ७६० मिलिग्राम फेला परेको हो। थप ब्राउन सुगर ३३ ग्राम ९० मिलग्राम राई दम्पतीको डेरामा खानतलासी गर्दा करुवा भित्र लुकाई राखेको अवस्थामा फेला परेको प्रहरीले जनाएको छ।

यस्तै प्रहरीले डिजिटल तराजु र २७ हजार ३ सय नगद समेत बरामद भएको छ। लागूऔषध कारोबारमा संलग्न रहेका चारै जनामाथि इलाका प्रहरी कार्यालय इटहरीबाट सुनसरी जिल्ला अदालतबाट म्याद थप भई अनुसन्धान भइरहेको छ।